Акции

Акции

УЛУУ КЫАЙЫЫ 75 СЫЛЫН КӨРСӨ 

«САХА САЛЛААТА» ААХСЫЙА

1941-1945 сыллааҕы Аҕа дойду сэриитэ хас биирдии саха ыалын таарыйбыта диэтэхпитинэ алҕаһаабаппыт буолуо. Бэйэтэ да элбэҕэ суох ахсааннаах саха норуота бу сэриигэ эр дьонун улахан аҥарын  сүтэрбитэ. Оттон тыыннаах эргиллибит саллааттар сорохторо сэриигэ ылбыт баастарыттан, сорохторо сэрии кэннинээҕи дойдуну чөлүгэр түһэрии сындалҕаннаах үлэтиттэн биһиги кэккэбититтэн эрдэ туораабыттара, сорохторо биһиги дьолбутугар тулуһан, эйэлээх олох амтанын толору билэн, ытык саастарыгар тиийбиттэрэ.  

Бэтэрээннэрбит Аан дайдыны аймаабыт алдьархайдаах сэрии туһунан бар дьоҥҥо кэпсээтилэр ини, кэпсээбэтилэр ини, биһиги – аныгы дьон саха саллаатын букатыннаахтык үйэтиттибит, сэрии туһунан кэнэҕэски көлүөнэҕэ сиһилии кэпсииргэ бэлэммит диэн этинэр кыахпыт суох. Биһиги оннук этинэр бырааппыт да суох. Тоҕо диэтэххэ, биһиги Кыайыыны аҕалбыт сүдү дьоммутун – сахабыт саллааттарын өйдүү-саныы, уруйдуу-айхаллыы сылдьар ытык иэспит хаһан да көҕүрээбэт уонна сотуллубат. 

 
«Көмүөл» кинигэ кыһата олоҕун толук ууран кыайыыны уһансыбыт саха саллаатын үйэтитэр соруктаах «Саха саллаата» диэн аахсыйаны биллэрэр. Аахсыйаҕа кыттыбыт матырыйааллары сүүмэрдээһин түмүгүнэн кинигэ тахсара былааннанар. Аахсыйа маннык түһүмэхтэринэн ыытыллар. 


1 түһүмэх. Бэтэрээн хаартыскатын уонна сэриилэспитин туһунан кылгас информациятын саайтка таһаарыы.  
2 түһүмэх. Бэтэрээн бэйэтэ суруйбут ахтыытын (хаһыакка тахсыбыт ыстатыйатын) эрэдээксийэлээн саайтка таһаарыы, кинигэҕэ анаан сүүмэрдээһин.  
3 түһүмэх. Бэтэрээн сэрииттэн ыыппыт суругун  саайтка таһаарыы, кинигэҕэ анаан сүүмэрдээһин. 


Болҕойуҥ! Ыйыллыбыт матырыйаалы маннык аадырыска ыытыҥ: uussakha2020@mail.ru (билсэр т. 89627394507)
Болҕойуҥ! Ханнык түһүмэххэ киирэргит туох матырыйаалы ыыппыккытыттан тутулуктаах. 
Болҕойуҥ! Сканердаммыт jpg эрэ форматтаах хаартыскалары уонна wоrd форматтаах суругу эрэ тутабыт