"Далаhа" - айар куттаах ыччат интернет-сурунаала

Айымньылар

ТЭТТИК ХОҺООННОР

Е.И. Попов дьиэ кэргэнин кытта

18.06.2020

 ТЭТТИК ХОҺООННОР

Попов Егор Ильич Чурапчы Мугудайыттан төрүттээх. Үлэ бэтэрээнэ. Билигин Дьокуускай куоракка олорор. П.П. Пинигин көмөлөһөөччүтэ. Аҕыйах хонуктааҕыта Поповтар «Олох угуйар ыллыктарынан» диэн аттаах дьиэ кэргэнинэн түмсэн суруйбут саҥа кинигэлэрэ бэчээттэнэн тахсыбыт. Кинигэҕэ дьиэ кэргэн араас сылларга суруйбут сүбэ-соргу тыллара-утахтара, иитэр-үөрэтэр суолталаах ыстатыйалара, сааһыламмыт санаалара, кэрчик бэлиэтээһиннэрэ, ситим хоһоонноро түмүллүбүттэр. Бүгүн Егор Ильич суруйбут тэттик хоһоонноруттан аҕыйаҕы таһаарабыт. 


Халлаан ыллыгын устун хаамабын,

Аллараа хаалбыт олоҕум

                                   суолун көрөөрү...

Кустук ыйар   ыллыгынан барабын,

Ырабын толорон ырайга тиксээри...

                     ***

Өрүттэр күммэр үөһэ дайан,

Өтөҕүм күөлүн чуумпу уутун

Өргөс кынаппынан 

                               таарыйан ааһыам.

Өрөгөй чааспар өрө дабайан

Өркөн күҥҥэ көҥүл көтүөм

Өбүгэм алааһын үрдүнэн.

                     ***
Ыксаа, бырастыы гынарга,

Хомойбуккун барытын умна.

Ыксаа, үөрүүнү уунарга,

Хоргуппут санааҕын тумна.

                     ***

Ыра санаам былытыгар уйдаран,

Ыраах былыттарга көтөн тахсабын.

Ытыйар тыалга ытыспын уунаммын,

Ыраас санаабын көҥүлгэ ыытабын.

                ***
 

Сиэркилэ саҥарбат эрэ буруйдаах,

Саһыарар кини дьиэ кэргэн кистэлин.

Сиэркилэ кэпсээбэт эрэ алҕастаах,

Сааһылыыр саҥата суох дьон сүрүн…

                     ***

Баҕарабын,    ыраас санаам былытыгар,

Куйаар кубата буолан көҥүл устуохпун.

Быстах санаабын былыт кэннигэр саһыаран,

Куппун дьолунан томточчу толоруохпун.

                 ***

Киһи уйан кута,

Курдаттыы куустарбыт эбит,

Таптал уостубат уотугар.

Киһи нарын тыына,

Харыстаан хатарыллыбыт эбит,

Таптал    бэриммэт суоһугар.

                     ***

Аһыныгас санаа, сап буолан,

Дьылҕа иннэтинэн үтэн киирэн,

Ааспыт    олох сүрэҕин баастарын,

Дьыл сабынан саба баайар.

                 ***


Быраҕыллыбыт тааһы салайбаттыы,

Барсыспыт   тылы төнүннэрбэккин.

Баар үтүө түгэни мүччү тутардыы,

Бириэмэ күндү тиһигин сиппэккин.

                     ***
Сулустар саһарҕалыы суһумнаан,

Сир сиигин дуйунан куталлар.

Сир симэҕэ сииккэ сууланан,

Саҥа күҥҥэ улгумнук арыллар…

                     ***

Түгэҕэ көстүбэт дьылҕам суола,

Туманы быыһынан саптыы субуллаҕын.                                                                                                                                                                                                                            

Ыраатар ыраах ыырдары тутуһаҕын,

Ырабын көтөр кынат оҥостон.

                     ***

Көрүҥ    эрэ,   ол ыраах саҕаҕы,

Кустук ыраас санааны ыһар.

Көрүҥ эрэ, кыырай халлааны,

Кустук ырай суолун ыйар.

                     ***

Таптал, эн олус да уйаннын,

Тыалга хатар сэбирдэхтии.

Анал, эн олус да хатаннын,

Уокка хатар тимирдии.          

                ***

Дьылҕа ыраас илиис кэриэтэ

Суруй онно эн тугу саныыргын:

Сүрэххэр сөҥөрбүт истиҥ иэйиигин

Куккар туппут кистэл санааҕын.

Комментировать

Авторизуйтесь

Комментарии


Комментарии 1 - 20 из 0
Начало | Пред. | | След. | Конец

Возврат к списку