Үөһээ Дьааҥы албан ааттаахтарын үйэтитэр үтүө үгэһин тохтоппот

02.11.2020
Улуу Кыайыы 75 сылынан Арассыыйаҕа Үтүө өйдөбүл уонна Албан аат сыла, Саха Өрөспүүбүлүэктигэр Дойдуга бэриниилээх буолуу сыла түмүктэнэн эрэр. Үөһээ Дьааҥы улууһун салалтата уонна «Көмүөл» кинигэ кыһата Аҕа дойду сэриитин кыттыылаахтарын үйэтитиигэ утумнаахтык уонна таһаарыылаахтык үлэлииллэр. Ол хамсааһын чэрчитинэн кинилэр «Вклад верхоянцев в дело Победы» (Үөһээ дьааҥылар Улуу Кыайыыга кылааттара) диэн сүдү суолталаах кинигэни таһаардылар.

Бу кинигэни үөһээ дьааҥылар урут таһаарбыт «Память I» (1995 г.), «Память II» (1996 г.), «Память III» (2000 г.), «Воины-верхоянцы» (2000 г.), «Воины-верхоянцы» (2010 г.) кинигэлэрин салҕааһына диэн сыаналыахха сөп. Кинигэни улууска тэриллибит «Кыайыы пуондатын» үлэтин чэрчитинэн В.З. Кириллина аатын сүгэр «Тымныы полюһа» кыраайы үөрэтэр түмэл үлэһиттэрэ хомуйан, талан биэрдилэр. 

Бары билэргит курдук, Сталин дьаһалынан Уһук Хоту эр дьонун Аҕа дойду сэриитигэр ыҥырбатахтара. Кинилэр соруктара атын этэ. Фроҥҥа сиртэн хостонор элбэх баай, эт, балык, түүлээх таҥас, харчы ирдэнэрэ. Ону хоту дойду олохтоохторо эрэ хааччыйар кыахтаахтара. Ол үрдүнэн, хоту дойду элбэх хоһууна тус баҕаларынан, атын военкоматтарынан үүт-хайаҕас булан, сэрии үөһүгэр киирбиттэрэ, кыргыһыы хонуутугар бастыҥнарын көрдөрбүттэрэ.

Сэрии саҕанааҕы докумуоннар Үөһээ Дьааҥы улууһа кыайыы туһугар фроҥҥа 6142 сылаас таҥаһы, 49 киилэ кыһыл уонна үрүҥ көмүһү, 21 мөлүйүөн солкуобайтан тахса сууммалаах харчыны ыыппыттын туоһулууллар. Ол харчыттан «Советская Якутия» бастакы уонна иккис танковай колонна тутуутугар хоту дойду олохтоохторо 842 тыһыынча солкуобай харчыны хомуйан биэрбиттэрэ биллэр.

Үөһээ Дьааҥы улууһуттан сэриигэ барбыт үгүс дьон туһунан чахчы аҕыйах буолан, кинигэ матырыйаалын хомуйааччылар Үөһээ Дьааҥы уонна Эбээн-Бытантай улууһун байыаннай комиссариатын архыыбыттан «Двадцать лет Победы в Великой Отечественной войне 1941-1945 гг.» мэдээли уонна «Үөһээ Дьааҥы оройуона» муниципальнай тэриллии архыыбыттан «1941-1945сс. Аҕа дойду сэриитин бириэмэтигэр килбиэннээх үлэлэрин иһин» мэдээли туттарыы боротокуолларын булан киллэрбиттэр. Боротокуолларга кыра салайааччыттан саҕалаан учууталга, булчукка, ыанньыксыкка уо да атын хара үлэһиккэ тиийэ хас биирдии киһи аата-суола, оҥорбут үтүөтэ сурулла сылдьара туохха да тэҥнэспэт сыаналаах матырыйаал буолар. Маны таһынан кинигэҕэ ол кэмнэргэ үлэлээбит, олорбут араас омук дьонун сэдэх хаартыскалара, ааттара-суоллара, фронтовиктар суруктара, докумуоннара өлгөмнүк киирбиттэрэ кэрэхсэбиллээх.

«Көмүөл» кинигэ кыһатын уонна бар дьон аатыттан Үөһээ Дьааҥы улууһун баһылыга Г.И.Чириковка, военкомат, түмэл уонна архыып үлэһиттэригэр бу үтүөкэн хамсааһыҥҥыт, үйэтитэр үлэҕит иһин барҕа махталбытын ыытабыт, чэгиэн-чэбдик туругу баҕарабыт.

Комментировать

Авторизуйтесь

Комментарии


Комментарии 1 - 20 из 0
Начало | Пред. | | След. | Конец

Возврат к списку