ЕГОР НЕЙМОХОВ СЭРГИИР, ТАПТЫЫР ХАРАҔЫНАН

09.10.2020

Егор Петрович Неймохов – саха норуод­унай суруйааччыта норуотугар өлбөт-сүппэт айымньыларын анаабыта, баай уус-уран нэһилиэстибэни хаалларбыта.

Кини айар үлэтэ үгүс өрүттээх. Саха си­рин уһаты-туора айаннаабыт, элбэҕи билби­тин-көрбүтүн үгүстүк суруйбут талааннаах суруналыыс уонна пубулуссуус, саҥа сонун тиэмэлэринэн ааҕааччыларын болҕомтотун тардыбыт сэһэнньит, саха улуу дьонун үйэтиппит арамаан айааччы, Саха Өрөспүүбүлүкэтигэр киинэ сайдыытыгар кылаатын киллэрбит киинэсэнэриис быһыытынан билли­битэ.

Быйыл сайын «Егор Неймохов. Сэргиир, таптыыр хараҕынан...» диэн саха норуодунай суруйааччыта Е.П. Неймохов олоххо көрүүлэрин, киһи быһыытынан мөссүөнүн арыйар биэс улахан түһүмэхтээх хомуурунньук "Көмүөл" кинигэ кыһатыттан ааҕааччы киэҥ араҥатыгар таҕыста. Кинигэни ХИФУ бэрэпиэссэрэ Г.Г. Филиппов, Е.Неймохов аатынан литэрэтиирэни уонна кыраайы үөрэтэр түмэл үлэһиттэрэ: М.Г. Комиссарова, А.П. Ефремова, З.Д. Тарасова хомуйан бэчээккэ бэлэмнээтилэр.

Манна Егор Петрович Неймохов үрдүк үөрэҕи бүтэрэн, саҥа үлэһит буолан иһэн, олох, таптал туһунан суруйбут сытыы тыллаах-өстөөх ыстатыйалара уонна кини уһуннук бодоруспут, үгүстүк алтыспыт убаастыыр дьонун ахтыылара, улахан суруйааччылар аһаҕас ырытыылара түмүлүннүлэр. Ону сэргэ ааҕааччылар санаалара, түмэл үлэһиттэрин анаарыылара, Е. Неймохов аатынан айар куттаах саха интеллигенциятыгар анаммыт стипендия хаһаайката, поэтесса Н.В Михалева-Сайа дириҥ ис хоһоонноох ыстатыйата киирдилэр.

Хомуурунньук баай ис хоһооно маҥнайгы түһүмэхтэн саҕалаан Егор Неймохов лиичинэһигэр ааҕааччы болҕомтотун тардан, улуу киһини элбэх өртүттэн көрдөрөр, айар үлэтин чугастык билиһиннэрэр аналлаах. 


Комментировать

Авторизуйтесь

Комментарии


Комментарии 1 - 20 из 0
Начало | Пред. | | След. | Конец

Возврат к списку