Кардиохирург Петр Захаров икки саҥа кинигэтэ биһирэннэ

24.10.2020

СЕРДЦЕ ЕДИНСТВЕННОЕ. СҮРЭХПИТ БИИР ЭРЭ...

«Говорят, что женщина любит ушами – опасно, её могут обмануть... Мужчина любит глазами – но он может ошибаться... Любите сердцем – это будет вернее и сильнее всего, навсегда!» диэн бэртээхэй бэргэн этииттэн саҕаланар саҥа кинигэ ааптар үлэтигэр айымньылаах сыһыанын уонна киһи быһыытынан хайдаҕын чаҕылхайдык көрдөрөр. Бу иэгэйэр икки атахтаах   тутаах уорганын – сүрэҕи сырдатар научнай-популярнай кинигэ Саха сиригэр сүрэх хирургиятын төрүттээччи, Арассыыйа үтүөлээх бырааһа, профессор, сүрэх хирургиятын отделениетын сэбиэдиссэйэ Петр Иванович Захаров 2017 сыллаахха таһаарбыт сахалыы кинигэтин тупсарыллыбыт нууччалыы барыйаана буолар уонна Саха сиригэр Сүрэх хирургиятын сулууспата тэриллибитэ 20 сылыгар ананар.

1980 cылларга Петр Иванович Захаров Сахабыт сиригэр соҕотох тымыр хирура этэ. Кини көҕүлээһининэн уонна сыратынан 1992 сыллаахха Саха сиринээҕи Мэдисиинэ национальнай киинигэр Тымыр хирургиятын, оттон 2000 сыллаахха Сүрэх хирургиятын отделениелара тэриллибиттэрэ. Ол түмүгэр билигин биһиэхэ аан дойду ирдэбилин таһымыгар эппиэттиир сүрэх хирургиятын бары хайысхаларынан уустук тымыр уонна сүрэх эпэрээссийэлэрэ оҥоһуллаллар.

Петр Иванович бу саҥа тахсыбыт дьоҕус кинигэтигэр олоҕун устатыгар ылбыт дириҥ билиитин-көрүүтүн, уопутун, кэтээн көрүүлэрин хайа баҕарар ааҕааччы болҕомтотун, интэриэһин тардар курдук олус сатабыллаахтык киллэрбитэ сөхтөрөр. Ол курдук, ааптар судургу, тиийимтиэ тыла-өһө, бэйэтэ уруһуйдаабыт иллюстрациялара, холобурдуур научнай чахчылара, мунньубут бэргэн этиилэрэ, архыып хаартыскалара, дизайна кинигэни атын кинигэлэртэн ураты гыналлар, кэрэхсэтэллэр. Кинигэ үс түһүмэхтээх: Эволюция мысли о сердце. Краткая история становления сердечно-сосудистой хирургии. Хирургическое лечение заболеваний сердца. «Көмүөл» кинигэ өҥөтүнэн тахсыбыт 500 эрэ ахсааннаах сонун таһаарыы бэйэтин ааҕааччытын булара саарбахтаммат.

Петр Захаров “Сердце единственное...” кинигэтигэр бэйэтэ суруйбут аан тылыттан:

Сердце человека весит всего лишь 250 – 350 граммов, однако оно перекачивает в сутки 7000 – 10 000 литров крови беспрестанно, а за год – 315 000 литров. Общая протяженность вен и сосудов человека составляет 100 000 км! Удивительно, но по этому длинному пути сердце за один день перекачивает кровь 100 раз со скоростью 40 км в час!

Сердце человека – удивительный орган. Сердце не только перекачивает кровь, но может взмывать вверх от радости и счастья, от огорчения – упасть в пропасть, со страху – замереть, или даже остановиться... от тяжкого горя... Состояние сердца очень сильно зависит от внутреннего душевного состояния и разума человека. Разные жизненные расстройства и треволнения, счастливые моменты и печали, невыносимые тяжкие происшествия – каждый человек неизбежно пропускает через свое сердце.

В ПАМЯТИ СЕРДЦА: НИКОЛАЙ ЭВЕРСТОВ

Сүрэх умнубат

Петр Иванович Захаров үлэтигэр бэриниилээҕин таһынан эрэллээх доҕор, коллега буоларын кини иккис кинигэтэ туоһулуур. Бу кинигэ кардиохирург Саха сиригэр сүрэх тэбэрин туһугар уустук суолу бииргэ тэлсибит, үгүс түбүктээх үлэтин тэҥҥэ үллэстибит коллегатыгар, Эверест хайаны дабайааччыга тэҥниир доҕоругар Николай Эверстовка ананар.

Николай Николаевич Эверстов өрөспүүбүлүкэҕэ Сүрэх анестезиологиятын уонна реаниматологиятын сулууспатын төрүттээччи, сүрэх реаниматологиятын отделениетын бастакы сэбиэдиссэйэ буолар. Үгүс дьоҥҥо кини ааттаах-суоллаах рок-музыкант, «Сэргэ» ансаамбыл вокалиһын быһыытынан биллэр.

Кинигэҕэ сахаларга тарбахха баттанар сэдэх дьонтон биирдэстэрэ, күн сириттэн соһуччу туораабыт Николай Эверстов сүрэх хирургиятыгар ураты суолун-ииһин, сүҥкэн үтүөлэрин туһунан бииргэ үлэлээбит дьонун, үөрэнээччилэрин истиҥ суруйуулара, ону сэргэ аймахтара, доҕотторо кинини айылҕаттан талааннаах мусукаан, куоластаах ырыаһыт быһыытынан ахтыылара киирдилэр. Ол барыта кинигэҕэ туһаныллыбыт сэдэх хаартыскалары кытта кэрэтик дьүөрэлэһэн Николай Эверстов чаҕылхай олоҕун толору көрдөрөллөр, иккис тыынныыллар, ааҕааччыны умсугуталлар.


Алтынньы 21 күнүгэр СӨ Национальнай бибилэтиэкэтэ Петр Иванович Захаров сүрэххэ сыһыаннаах икки саҥа кинигэтин онлайн биһирэмин тэрийэн ыытта. Кыттааччылар ытыктабыллаах ааптарга элбэх эҕэрдэ, махтал тылларын эттилэр, тахсыбыт кинигэлэр олус тупсаҕай оҥоһуулаахтарын, ураты ис хоһоонноохторун, мэдисиинэ эйгэтигэр улахан суолталаахтарын бэлиэтээтилэр.

Комментировать

Авторизуйтесь

Комментарии


Комментарии 1 - 20 из 0
Начало | Пред. | | След. | Конец

Возврат к списку