САХАЛАРТАН МАҤНАЙГЫ ҮЛЭ ГЕРОЙУН ТУҺУНАН КИНИГЭ ТАҔЫСТА

10.07.2020

Мэҥэ Хаҥаластар үүммүт 2020 сылы тыылга Улуу Кыайыыны уһансыбыт «Комбайн» холкуос чулуу сылгыһыта, сахалартан маҥнайгы Социалистическай Үлэ Геройа Афанасий Егорович Степанов төрөөбүтэ 100 сылын бэлиэтээһинтэн саҕалаабыттара. Үбүлүөйдээх сылга бэлэмнэнии чэрчитинэн былырыын Бүтэйдээххэ уонна Майа сэлиэнньэтигэр Герой А.Е. Степановка аналлаах аныгы сквердэр оҥоһуллубуттара. Оттон бу сылга кини туһунан үтүө өйдөбүлү хаалларар, Герой таһаарыылаах үлэтин сырдатар дьоһуннаах кинигэни суруйан таһаардылар.

Ол туһунан Саха Өрөспүүбүлүкэтин тыатын хаһаайыстыбатын миниистирэ Александр Павлович Атласов маннык суруйар: «Үлэҕэ чаҕылхай түмүктэринэн, ситиһиилэринэн бэйэлэрин ааттарын умнуллубаттык суруйан, чахчы да дириҥ суолу-ииһи хаалларбыт ытык дьоммутун сөҕө, киэн тутта саныыбыт. Аныгы кэмҥэ курдук үлэни чэпчэтэр аналлаах элбэх тиэхиникэ да, технология да суох кэмнэригэр кинилэр кыһыл илиилэринэн, сүрэхтэрин-дууһаларын бүтүннүү ууран туран, хайдахтаах курдук чулуу көрдөрүүлэри ситиспиттэрий, кыайыынан-хотуунан көтөллөммүттэрий? Биир оннук сүдү киһибит, «Комбайн» холкуос чулуу сылгыһыта, тыылга Улуу Кыайыыны уһансыбыт Афанасий Егорович Степанов быйыл төрөөбүтэ 100 сылын бэлиэтиибит.

Афанасий Степанов айылҕа маанылаах оҕотун - сылгыны иитиигэ үлэ бастыҥ ньымаларын, дьоҕурун-талаанын туһанан, туох баар өйүн-санаатын ууран, сыратын-сылбатын биэрэн, күүскэ үлэлээбитэ мэлдьэх буолбатах. Ол туоһутунан кини Чурапчы Мындаҕаайытын сылгыһытын Роман Иннокентьевич Константиновы кытта тэҥҥэ биир уурааҕынан 1948 сыллаахха сахалартан маҥнайгынан Социалистическай Үлэ Дьоруойун үрдүк ааты сүкпүттэрэ. Афанасий Степанов оччолорго баара-суоҕа 28 саастааҕа. Ол да буоллар кини бэйэтин кэмигэр килбиэннээх үлэтинэн, ситиһиилэринэн аатыран, сылгы иитиитигэр уонна сайыннарыытыгар үгүс сыралаах үлэни ыыппыта, сүҥкэн кылааты киллэрбитэ.

Билигин Мэҥэ Хаҥалас улууһун үрдүнэн 16 тыһыынча кэриҥэ сылгы баар. Кэнники сылларга бу салааҕа ыччат хотоойутук ылсыбыта хайҕаныан эрэ сөп. Ол курдук үгүс эдэр киһи бааһынай хаһаайыстыбаларын тэринэн, сылгыны иитиинэн утумнаахтык дьарыктанан эрэллэр. Маныаха Үлэ Дьоруойа Афанасий Степанов хаалларбыт үлэтин суола куруук холобур буоларыгар эрэнэбит.

Мэҥэлэр, биир дойдулааххыт - чулуу сылгыһыт Афанасий Егорович Степанов туһунан кинигэ таһаарбыккыт хайҕаллаах суол. Бу кинигэ эдэр дьоҥҥо, чуолаан сылгыһыттарга, бастыҥ бэлэх буолар».

Улуус баһылыга Старостин Николай Прокопьевич кинигэ туһунан санаатын үллэстэр: «Биһиги биир дойдулаахтара Геройбутунан киэн туттан кэллибит, үйэтитэр, чиэстиир үлэни тиһигин быспакка ыытаммыт үйэлээх сааһыгар үктэннибит. Сиэрдээх сэбиэскэй сыллартан кини аатынан уулуссалар дойдутугар Бүтэйдээххэ, Майаҕа бааллар. Бүтэйдээххэ саҥа кулууп 1965 с. аһыллыытыгар А.Е. Степанов аатын иҥэрбиттэрин билигин бэрт аҕыйах киһи билэр. Ол курдук умнулла быһыытыйбыттара А.Е. Степанов аатынан ыччат-комсомольскай фермата, сылгыга племенной хаһаайыстыба, пионерскай этэрээттэр, үлэ бириэмийэтэ. А.Е. Степанов чаҕылхай олоҕун, тыылга үлэтин кэпсиир саҥа кинигэ эдэрдэргэ кэс тыл, аҕам дьоҥҥо үтүөкэн бэлэх буолуо. Баҕарабын Геройдар дойдулара Мэҥэ Хаҥаластан А.Е. Степановтаах холоонноох холобурдарыгар РФ Үлэ Геройа үүнэригэр».

«Бүтэйдээх нэһилиэгэ» муниципальнай тэриллии баһылыга Александр Егорович Слепцов кинигэ киэҥник, кичэллээхтик суруллуутугар тус баҕаларынан үлэлэспит биир дойдулаахтарыгар: Герой сиэнигэр А.Н. Малгароваҕа, музей үлэһиттэригэр К.К. Родионовка, В.Н. Кириллиҥҥэ, бэтэрээн учууталга, кыраайы үөрэтээччигэ В.И. Чямпинаҕа, үбүлээһини быһаарбыт Саха Өрөспүүбүлүкэтин Тыатын хаһаайыстыбатын министиэристибэтигэр, Мэҥэ Хаҥалас улууһун дьаһалтатыгар улаханнык махтанар.

 

Комментировать

Авторизуйтесь

Комментарии


Комментарии 1 - 20 из 0
Начало | Пред. | | След. | Конец

Возврат к списку