Нам улууһун тохсус «Мэҥэ Тааһа» таҕыста

Нам улууһун тохсус «Мэҥэ Тааһа» таҕыста

Дизайнер Ирина Захарова, редактор Варвара Саввинова

08.05.2020

Кыайыы 75 сыла

Киһи аймах устуоруйатыгар иэнэ суох иэдээни, аана суох алдьархайы аҕалбыт, оспот сүрэх баастаах, уолбат харах ууулаах Аҕа дойду сэриитин кыттыылаахтарын Орто дойдуга баарбыт тухары кэриэстиир ытык иэстээхпит. Нам улууһа бу үтүө үгэһи кэспэккэ Кыайыы 75 сылыгар «Мэҥэ Таас» мемориал-кинигэ тохсус туомун бэлэмнээн «Көмүөл» кинигэ кыһатын өҥөтүнэн бэчээттэтэн таһаарда.

Бу элбэх сыраны эрэйэр эппиэтинэстээх үлэни П.И. Сивцев аатынан Намнааҕы история уонна этнография түмэлин үлэһиттэрэ сүрэхтэринэн-быардарынан чугастык ылынаннар, олус кыһаллан уонна болҕойон оҥордулар, бэчээттэнэн тахсар күнүн долгуйа кэтэстилэр. 1995 сыллаахха мемориал-кинигэ маҥнайгы туома тахсыаҕыттан сэрии хонуутугар охтубут, билиэн түбэһэн сэймэктэммит, сураҕа суох сүппүт 1849 саллаат үйэтитиллибит буоллаҕына, саҥа туомҥа эбии 650 саллаат ыар дьылҕата суруллубут. Ону таһынан Түмэл үлэһиттэрэ үбүлүөйдээх тохсус туомҥа Саха национальнай архыыбыгар хараллан сыппыт Нам военкоматын 1941-1950 сыллардааҕы докумуоннарын, олор истэригэр саллаат ханна хайдах өлбүтүн, көмүллүбүтүн туһунан иһитиннэриилэри, төрөппүттэрин, аймахтарын туһунан суруллуулары, сэрииттэн төннөн кэлбит, саҥардыы ыҥырыллыбыт дьон испииһэктэрин уонна онтон да атын архыып докумуоннарын хас биирдиилэрин үөрэтэн, наардаан киллэрбиттэрэ сүҥкэн суолталаах. Кинилэргэ улуус военкомата, улуус бэтэрээннэрин сүбэтэ, нэһилиэк дьаһалталара, архыып үлэһиттэрэ, устуоруйаны үөрэтээччилэр көмөлөстүлэр.

Онон «Мэҥэ Таас» мемориал-кинигэ кылгас кэм иһигэр хомуллан киэҥ эйгэҕэ тахсыыта барыбыт үөрүүбүт, Улуу Кыайыыны уһансыбыттарга дириҥ махталбыт бэлиэтэ, үүнэр көлүөнэҕэ утары уунар үйэлээх өйдөбүнньүкпүт.

 

 

 

Автор: Күндэли

Комментировать

Авторизуйтесь

Комментарии


Комментарии 1 - 20 из 0
Начало | Пред. | | След. | Конец

Возврат к списку