Розалия Егоровна Лукина: «Нэһилиэктэрбит салгыы сайдалларыгар олук буоллун диэн аныыбын...»

10.07.2020

Аныгы кэмҥэ дьахтар салайар дуоһунаска үлэлиирэ улахан сонун буолбатах. Оттон урут дьахтар салайааччы буолара олус сэдэх уонна уустук этэ. Арай 80-90-с сыллартан бэттэх сахаларга дьахтар салайааччы ахсаана биллэрдик элбээн барбыта. Дойду ыһыллар, урукку олох оҥкула алдьанар, үп-харчы суох буолар кэмигэр элбэх саха дьахтара эппиэтинэһи  бэйэтин чараас санныгар сүкпүтэ. Олортон биирдэстэрэ – Нам улууһун Түбэ нэһилиэгин бастакы баһылыга Розалия Егоровна Лукина. Кини туһунан нэһилиэк билиҥҥи баһылыга Константин Константинович Федоров маннык суруйар:

«Розалия Егоровна Саха Өрөспүүбүлүкэтин норуотун хаһаайыстыбатын үтүөлээх үлэһитэ, Нам улууһун уонна Түбэ нэһилиэгин Бочуоттаах олохтооҕо. Кини 1945 сыллаахха, о.э. Кыайыы өрөгөйдөөх сылыгар күн сирин көрбүтэ. Ол иһин да буолуо, кини үлэтигэр куруук кыайыылаах буолар этэ. Дьалхааннаах 90-сылларга, саҥа ХХI-с үйэ бастакы сылларыгар Түбэ нэһилиэгин салайан, төрөөбүт дойдутун инники кирбиигэ таһаарбыт киһинэн буолар. Сайдыы аартыгын арыйсан, нэһилиэк сүрүн сайдар тирэхтэрин – суол тутуутун, газ уматыгын киллэрии үлэтин туруорсан сүүрэн-көтөн саҕалаабыта. Кини салайыытынан өссө 80-с сылларга Түбэ нэһилиэгэ арыгыттан аккаастанар политиканы саҕалаабыта, ол олоххо киириитин түстээбитэ. Кэлин Өрөспүүбүлүкэ Президенэ М.Е. Николаев ыйааҕынан, правительство уурааҕынан Түбэ «Чөл олох иһин охсуһар» тирэх нэһилиэгинэн ааттаммыта, бигэргэммитэ. Үлэлиир сылларыгар элбэх социальнай эбийиэктэри туттарбыта, ол иһигэр Нам улууһугар бастакынан «Үтүө Дьыала» чэрчитинэн арочнай спортзал, балыыһа, сынньанар киин уо.д.а. объектар үлэҕэ киириилэрин ситиспитэ, үлэ­лээбит сылларыгар нэһилиэнньэ үлэлиир, олорор усулуобуйатын тэ­рийиигэ, олоххо-дьаһахха көмүскэллээх буолууга элбэҕи оҥорбута. Хас да сыл субуруччу туйгун социальнай-экономическай көрдөрүүлэрин иһин Өрөспүүбүлүкэ Правительствотын гранын ылбыта. Тапталлаах Наммыт улууһа сайдыытыгар Розалия Егоровна быһаччы улахан суолталаах».

Бастакы баһылык Р.Е. Лукина бочуоттаах сынньалаҥҥа да олорон тапталлаах нэһилиэгэр идэтинэн туһалыы сылдьар. Ол курдук, Розалия Егоровна баһылыктыы сылдьыбыт кэрдиис кэмин, бииргэ үлэлээбит дьонун-сэргэтин үйэтитэр санааттан «Түөлбэбэр анаммыт олоҕум» диэн дьоһуннаах кинигэни суруйан бар дьонугар бэлэх уунна. Кинигэҕэ Нам улууһун Түбэ нэһилиэгин 1982-2007 сс. сирэ-уота, дьоно-сэргэтэ, кинилэр нэһилиэк сайдыытыгар туһуламмыт үлэлэрэ-хамнастара сырдатылынна. Ааптар кинигэ тахсыытыгар улахан көмөнү оҥорбут Ю.И. Слепцов баһылыктаах Нам улууһун дьаһалтатыгар уонна К.К. Федоров баһылыктаах Түбэ нэһилиэгин дьаһалтатыгар барҕа махталын тиэрдэр.

Комментировать

Авторизуйтесь

Комментарии


Комментарии 1 - 20 из 0
Начало | Пред. | | След. | Конец

Возврат к списку