Уһаарар оһох аттыгар итии чэй иһэ-иһэ турар наһаа да үчүгэй эбит...

23.10.2019

Ааҕааччы сонуна

 

Уһаарар оһох аттыгар итии чэй иһэ-иһэ турар наһаа да үчүгэй эбит...

Балаҕан ыйын 28 күнүгэр Дьокуускай куоракка олорор, үлэлиир көмүс ууһа Потапов Николай Ильич уһаайбатыгар сайыҥҥы уус кыһатын арыллар үөрүүлээх тэрээһинэ ыытылынна. Бу түмсүүгэ республикабыт биллэр-көстөр маастардара Иван Павлов-Утум уус, Василий Герасимов, Ньургустаан Уаров, Руслан Захаров, Леонид Говоров, ХИФУ преподавателэ Николай Николаевич Бурцев уо.д.а. кыттыыны ыллылар, уопуттарын атастастылар уонна көрдөрүү тимири уһаарыы буолан ааста. Бу күн инчэҕэй хаардаах ардах аннынан үлэ күөстүү оргуйан олордо.

Мин тимир уһаарыыта ыытылларын истэммин уус убай оҥостубут улаханнык убаастанар дьоммор тиийдим уонна Николай Ильич Потаповы илэ харахпынан бастакыбын көрүстүм. Сайын Нам ыһыаҕыгар тимир уһаарыытыгар элбэх уустар ортолоругар билсибэтэх эбиппин.

Таһырдьа тымныыга... Ол турдаххына тото-хана аһаабыт уустар тахсан: “Биһиги солбуйуохпут, эһиги киирэн аһааҥ”, – диэн дьиэҕэ ыҥырдылар. Дьиэ аанын арыйааккын кытары итии салгын сылааһынан ил гынар. Хаһаайыттар икки улахан остуол хотойорунан минньигэс ас бөҕө бэлэмнээбиттэр. Биһиги иннибитинэ сүүрбэччэ эр киһи аһаан тахсыбыта биллибэт, ас көҕүрээбитэ көстүбэт. Астара элбэҕээ...

Күнүс 12 аҥаарга бастакы рудабытын куттубут. 15 мүнүүтэ буола- буола балтараалыы, иккилии киилэнэн куттубут. Онтон бүтэһигэр хаалбыт 3.5 киилэни ууллара хааллардыбыт. Уопсайа 26.5 киилэ рудаттан 7кг820 г болгуо тимирэ тагыста, онтон ыраас тимирэ 6кг 460г. Бэйэм суоттаан таһаарбыппынан, бу тахсыбыт болгуо 83% тимиртэн турар.

Тимирбитин хостооппутун кытары күөсчүт Руслан Захаров туойтан оҥорбут иһиттэригэр итии оһоххо үүт оргутта уонна эттээх миин буһара уурда. Аһа оргуйар кэмигэр бэйэтэ көрөөччүлэргэ туойунан иһит оҥорорго маастар кылаас көрдөрдө. Дьон бөҕө интириэһиргээн Русланныын тэҥҥэ оҥорсон сатаатылар уонна дьиэлэригэр туой иһит оҥостон илдьэ бардылар. Киһи эрэ сатаабат уустук соҕус үлэтэ эбит, мин, холобур, сатаабатым. Ким үлэлиир – ол аһыыр диэн кырдьык эбит. Руслан эт бустаҕына маҥнай миэхэ амсатыах буолта. Дьэ мин эппит буһарын өр да өр күүттүм, ол да буоллар эппин улахан дьон кэнниттэн үһүс уочаратынан сиэтим...Олох амсайбыт эрэ барыта бигэргэтиэ, туой иһиккэ, аһаҕас уокка буспут эттээх миин, үрүмэлээх үүт амтана ураты, дьиҥ сахалыы диэххэ дуу, буолар эбит.

Уоттаах-күөстээх үлэ быыһыгар көрдөөх да түгэннэр элбэх буолан биэрдилэр. Уот үрдүгэр сакалааппын ууллара-ууллара сии турдум. Арай сакалаатым суута умайан тагыста... Нэһиилэ умулларан баран амсайан көрдүм. Суутун кытары тэҥҥэ умайбыт сакалаат наһаа хобдох амтаннаах буолар эбит. Иннинээҕи күн оһохпут таһын маһынан иилээбиттэр этэ. Ол маспытыгар Любовь Гаврильевналыын уһаарыы кэтэһэр кэммитигэр чоҕунан “худуоһунньуктаатыбыт”: таах туруохтааҕар дьоннор сирэйдэрин уруһуйдаан “киэргэттибит”.

Бу курдук таһаарыылаахтык уонна бэһиэлэйдик өссө биир тимири уһаарыы күнэ ааста. Уус убайдарбыт элбэх араас маастар кылаастары көрдөрөн дьоҥҥо – сэргэҕэ бэйэлэрин хайҕаттылар, көрөөчүлэри сөхтөрдүлэр.

Автор: Айталана Пухова

Комментировать

Авторизуйтесь

Комментарии

20.01.2020 ФИО
Комментарий


Комментарии 1 - 1 из 1
Начало | Пред. | 1 | След. | Конец

Возврат к списку